KORETINI I DHA LAMTUMIRËN E FUNDIT ARSIMTARIT DHE DREJTORIT TË RESPEKTUAR, ISMET HODA

Më 25 mars 2026, Koretini i Dardanës i dha lamtumirën e fundit ish-arsimtarit dhe ish-drejtorit të Shkollës Fillore “Abdullah Krashnica”, Ismet Hoda, i cili u nda nga jeta në moshën 80-vjeçare. Në ceremoninë mortore morën pjesë qindra familjarë, bashkëvendës, miq, kolegë dhe ish-nxënës, të cilët me dhimbje dhe respekt nderuan jetën dhe veprën e tij. Ismet Hoda do të kujtohet si një figurë e dashur e arsimit dhe e komunitetit, që la pas një emër të nderuar dhe një trashëgimi të vyer njerëzore e arsimore.

Nga Xhevdet Kallaba

Koretini i Dardanës, më 25 mars 2026, i dha lamtumirën e fundit një njeriu që për dekada me radhë ishte pjesë e pandashme e jetës së këtij vendi – ish-arsimtarit dhe ish-drejtorit të Shkollës Fillore “Abdullah Krashnica”, Ismet Hoda, i cili u nda nga jeta në moshën 80-vjeçare.

1 of 13

Ishte një ditë e rëndë për familjen, për miqtë, për kolegët, për ish-nxënësit dhe për gjithë bashkëvendësit që e njohën dhe e respektuan. Në ceremoninë e varrimit morën pjesë qindra qytetarë, të cilët me dhimbje, por edhe me mirënjohje, i dhanë nderimin e fundit një njeriu që jetoi me dinjitet, punoi me ndershmëri dhe shërbeu me përkushtim.

Ismet Hoda do të kujtohet si një figurë e dashur dhe e respektuar e arsimit në Koretin. Për vite të tëra, ai i dha shkollës jo vetëm punën dhe dijen e tij, por edhe urtësinë, qetësinë dhe dashurinë për nxënësit e për komunitetin. Në klasë si arsimtar, e më vonë edhe në drejtimin e shkollës, ai mbeti shembull i njeriut të matur, korrekt dhe të përkushtuar.

Pas ceremonisë fetare, një nekrolog kushtuar jetës dhe veprës së tij e lexoi bashkëvendësi dhe ish-shoku i klasës, Prof. dr. Tefik Basha, i cili e përshkroi Ismet Hodën si një nxënës të shkëlqyer, një arsimtar të devotshëm dhe një njeri me vlera të rralla njerëzore.

Në fjalën përkujtimore u tha se ai ishte ndër nxënësit më të mirë të shkollës në Koretin, i dalluar për dashurinë ndaj dijes dhe seriozitetin në rrugëtimin e tij arsimor. Më pas, atë dashuri për shkollën dhe dijen ai e ktheu në mision jetësor, duke edukuar e formuar breza të tërë nxënësish.

Por mbi të gjitha, Ismet Hoda do të mbahet mend si njeri i mirë. Si njeri që nuk e ngrinte zërin, por që dëgjohej me respekt. Si njeri që nuk kërkonte lavdi, por la gjurmë të thella në zemrat e atyre që punuan, jetuan dhe u rritën pranë tij.

Sot, Koretini i jep lamtumirën një mësuesi, një drejtuesi dhe një qytetari shembullor. Por kujtimi për të, fjala e tij e urtë dhe vepra e tij në shërbim të arsimit do të mbeten gjatë të gjalla ndër njerëz.

I lehtë i qoftë dheu i Kosovës. Qoftë i paharruar kujtimi për Ismet Hodën