Heronjtë e bardhë të Anamoravës – jo vetëm mjekë, por edhe simbol i përkushtimit dhe dashurisë për njerëzit. Njihuni me historitë e tyre në monografinë e re të autorit dr. Xhavit Hajdari!
Monografia “Veteranët e shëndetësisë së Anamoravës” e Dr. Xhavit Hajdarit është një vepër me vlera historike, shkencore dhe kulturore. Ajo përmbledh biografitë e 110 mjekëve të brezit të parë nga Anamorava dhe kujtimin e dy studentëve të mjekësisë të rënë dëshmorë në luftën e fundit të Kosovës, duke dokumentuar zhvillimin e shëndetësisë në këtë trevë.
Përmes një parathënieje gjithëpërfshirëse, autori pasqyron rrugëtimin e mjekësisë shqiptare nga hapja e Fakultetit të Mjekësisë në Prishtinë deri te pensionimi i mjekëve të parë. Veçanërisht vlerësohet puna e mjekëve që shërbyen në Spitalin Rajonal të Gjilanit dhe qendrat e Kamenicës e Vitisë, me përkushtim në fusha të ndryshme si kirurgjia, pediatria, gjinekologjia, stomatologjia e të tjera.
Monografia nuk është vetëm arkiv biografish, por edhe dëshmi e gjallë e historisë shoqërore, arsimore e kulturore të Anamoravës. Siç thekson recensioni i Dr. Zijadin V. Hasanit, biografitë tregojnë lidhjen e fortë të mjekëve me komunitetin dhe rolin e tyre në shëndet, arsim e emancipim shoqëror.
Të dhënat statistikore tregojnë se mjekët e kësaj treve u formuan në qendra të ndryshme akademike si Prishtina, Beogradi, Zagrebi, Sarajeva, Tirana, Stambolli, Berna e Parisi, duke sjellë përvojë të pasur dhe larmi specializimesh. Ndër figurat kryesore spikat Dr. Fahri Rashidi (1881–1944), mjeku i parë shqiptar nga Anamorava, i formuar në Stamboll e Paris, kirurg dhe ortoped, por edhe intelektual e ministër arsimi në Qeverinë e Fan Nolit.
Kjo monografi është një homazh për brezat e mjekëve që shërbyen me dinjitet dhe një burim i çmuar për studiuesit. Ajo ruan kujtesën kolektive dhe forcon krenarinë tonë të përbashkët, duke e bërë figurën e mjekut shqiptar të Anamoravës shembull frymëzimi për brezat që do të vijnë./Xhevdet Kallaba/
