Në ambientet e sallës së pritjes të fshatit Shipashnicë e Epërme u mbajt tubimi përkujtimor në 20 vjetorin e rënies së dëshmorit, Liridon S. Dërmaku, i vrarë nga forcat sllavomaqedonase më 24 dhjetor 2004, në Tetovë.
Tubimi përkujtimor në 20 vjetorin e vrasjes së studentit Liridon S. Dërmakut ka shfaqur një ndjenjë të thellë respekti, nderimi dhe përkujdesjeje, për një figurë të rëndësishme të ditëve tona. Biografia e Liridonit, e treguar me ndjeshmëri dhe përkushtim nga moderatorja, Lea Dërmaku, flet për një individ të jashtëzakonshëm, i cili u shqua ndër studentë për karakterin e fortë dhe përkushtimin ndaj vlerave të atdheut.
1 of 19
Asnjë fjalë nuk mund të përshkruajë me plotësi dhimbjen dhe guximin e familjes Dërmaku në përkujtim të djalit të tyre të dashur, Liridonit. Në 20 vjetorin e vrasjes së tij, tubimi përkujtimor ishte një rrëfim i jashtëzakonshëm i sakrificës, vetëmohimit dhe përkushtimit për lirinë dhe drejtësinë në Maqedoni.
Liridoni, një student i talentuar dhe i guximshëm, u nda nga jeta në moshën e re, duke u bërë një amanet i pashlyer për gjeneratat e ardhshme. Vendimi i tij për të bashkuar studimet me angazhimin në Frontin Kombëtar Shqiptar u përball me sfida dhe rreziqe, por ai nuk u përmbajt asnjëherë. Dashuria dhe dëshira e tij për lirinë e kombit përfaqësoi një shembull frymëzues për të gjithë shqiptarët.
Në një ceremoni plot emocione, përfaqësues të komunës, studentë të universitetit të Tetovës dhe miq e familjarë të Liridonit, u mblodhën për t’i treguar atij se ai nuk është harruar, se amaneti i tij do të vazhdojë të jetë ndriçim për rrugën e punës së mirë dhe dashurisë për vendin.
Në një tubim të ndezur me emocione dhe nderime, zërat prej nderimit dhe admirimit për shërbimin dhe sakrificën e Liridonit u ngritën lart. Fjalët e kryesuesit të Kuvendit të Komunës, z. Liridon Kastratit, se “frymëzimi vjen nga lart dhe kur e themi nga lart themi se familja Dërmaku me breza e ka trashëguar atdhedashurinë me anë të veprimtarisë së saj të lavdishme” tregojnë përkushtimin dhe solidaritetin e komunitetit ndaj dëshmorit Liridon Dërmaku, busti i të cilit përditë rrezaton frymëzim atdhedashurie te bashkëfshatarët e tij.
Fjala e profesorit të Liridonit, dr. Rexhap Emërllai i dha vulë angazhimit dhe sakrificës së Liridonit për luftën e tij drejt bashkimit kombëtar. Në fjalën e tij prof. Emërllai shpërfaqi mesazhet për betejën për bashkimin kombëtar si dhe krenarinë për dëshmorët që janë gati për të sakrifikuar për lirinë e vendit e që përbëjnë një kujtesë të jashtëzakonshme për të gjithë ne që i ndjekim rrugët e tyre.
Fjala e Malë Jazhincës – Komandant Mala ishte një vlerë e shtuar në frymën ushtarake për Liridon Dërmakun. Ai, duke iu drejtuar familjes Dërmaku si dhe familjeve të dëshmorëve të të tri luftërave për ribashkim kombëtar, tha se jemi mbledhur këtu për të kujtuar dhe rikujtuar sakrificën e Liridonit, me emrin STUDENT.
Në këtë ceremoni të veçantë, duam të falënderojmë edhe Unionin Studentor nga Tetova dhe Komandant Shpëtimin për angazhimin e tyre në luftën për çlirimin e Preshevës, Medvegjës dhe Bujanocit. Kontributi i tyre është i jashtëzakonshëm dhe duhet të nderohet gjatë gjithë historisë sonë kombëtare, tha Komandant Mala dhe vazhdoi se, studenti i rezistencës së 2001-shit ka lënë gjurmë të pashlyeshme në historinë tonë. Ai ka treguar guxim dhe vendosmëri në përballje me armikun sllavomaqedonas dhe ka dhënë jetën për lirinë e vendit tonë, njësoj siç kishte bërë më vonë (2014) edhe studenti tjetër i Tetovës, Burim Huseini, duke sakrifikuar jetën e tij në përmbushje të betimit: “Unë si luftëtar i Luftës Çlirimtare të Dardanisë betohem se do të luftoj deri në ribashkimin e tokave shqiptare”! … si dhe të porosisë së nënës së tij: “Burimi i nënës, ke kërkuar luftën – pa liri – mos m’u kthe!
Prandaj luftëtarët si Liridoni e Burimi si dhe familjet e dëshmorëve janë një pjesë e rëndësishme e historisë sonë kombëtare. Ata kanë lënë gjurmë të pashlyeshme në kujtesën tonë dhe duhet të nderohen përgjithmonë për guximin dhe përkushtimin e tyre ndaj lirisë dhe pavarësisë së vendit tonë.
Në emër të familjes mysafirët dhe të pranishmit tjerë i përshëndeti z. Rabit Dërmaku, duke i falënderuar për respektin e treguar ndaj Liridonit dhe gjithë familjes Dërmaku nga Shipashnica e Epërme.
Në fund, vendosja e kurorave pranë varrit të Liridonit ishte një akt i respektit dhe kujdesit të përkujtimit për të. Mesazhet e mbështetjes dhe solidaritetit nga mysafirët dhe familjarët treguan se trashëgimia e Liridonit do të jetë një dritë udhërrëfyese për gjeneratat e reja për të ndjekur rrugën e drejtë dhe të dashurisë për vendin.
Lavdi dhe nder për Liridonin, një hero i paharruar, i cili do të mbetet në zemrat e shqiptarëve si një shembull i jashtëzakonshëm i guximit dhe angazhimit për liri dhe drejtësi. Ajo që la pas, veprat dhe amanetet e tij, do të jenë një frymëzim për të gjithë që duan të shkojnë përpara dhe të ndërtojnë një shoqëri më të mirë dhe më të drejtë për të gjithë. Hëna vazhdon të ngrihet për dëshmorët që dhanë jetën për lirinë tonë!
Dreka e organizuar nga familja Dërmaku ishte edhe një rast për të dëshmuar bukëdhënien, por edhe për ta kujtuar e rikujtuar sakrificën dhe guximin e Liridonit, ku të pranishëm ishin edhe mysafirët nga Tetova: dr. Rexhep Emërllai, Malë Jazhincë Tetova, prof. Mefail Zylbehari dhe prof. Aziz Jakupi. Gjatë drekës, të pranishmit ndanë historitë e tyre dhe përkujtuan momentet, të cilat i kishin ndarë me Liridonin./Xhevdet Kallaba/
